Бишкек дэ Ош, җы лёнгә да чын, далющинбин җён до жынжын җунҗян, чечў РЦПЗди җишу зуәли лёнгә бохў жынжын щинли җянконди жунщин. Җытарди дэфуму ги чүан Республикади  быйщинму  ги йүаншын бонцули, зэ халэ, дансы ю йүнчў,   йидин вон җунщинни хан чин тамули.

РЦПЗди жунщинди буфунди тузы Гульмира Базарбаева  зэ дянхуашон ба дэфуму  ги  бинжынму гунйүн бонцу йиҗянди сыхур чиннян-даҗянхади гәшы-гўёнди чинкуон зэмусы замуҗя далющинбин йинщён Кыргызстанди жынжынди  щинли җянконди чинкуон нэчир бощянли йицы.

Тин дэфуди хуа: – Зуә жунщин йинганди ганбан яндин ю ёҗин йүанйини, йинцы КОВИД-19 ­– җысы щин биндў, ба та  сысый ду мә янҗюгуә, дуәди сыщёнди җысы канбуходи йи ёнзы бин. Зэ халэ бушоди жын ба та  суандисы бянхади  куонкуонзы, билүн, таму сыщёнди, җысы дыйдо сый щёнхади йинви чўҗы димяншонди  йицын жынди йигә дэдў фонфа. Зу да җыгәшон ба  хын дуәди жын ду хади хуншысанли зэмусы ба тиҗиди щинфу дюдёли.

Да дэфуди хуашон нын канулэ, йицын жынди жунҗянни данщин зэмусы хэпа мын пэчелэли, җинхади нэгә луәҗүә  җянҗян җуанчын дў бин, йүәщин йинди куэли; тади дин винанди сыҗян дон зусы щятян сыхур.

 – Җын щятянди  сыҗян ги вәму дади дянхуа дуәди йимяр, вәму җыни ги йигә бинжын ба хуэйда гиги, дянхуа донсывәр лянсан-гансыди кэ зу щёндини. Тэ нан йи ханни зэ дянхуашон ги бинжынму цун бонцу зэмусы ди эрханни зэ РЦПЗ буфынни ган тиҗиди ёҗин йинган. Чўгуә җыгә юди жын, җинхади луәжүә дади йимяр, бан-е-сангын хуэйҗәсы либэ чи хан да дянхуани, – Гульмира Базарбаева фәди. – Нэгә сыҗян йитян эршы җи бянҗя дянхуа щённи, щянзэ нэгә фыр до 5-7-шонли, – йихў та кә җешон фәди.

Гульмира Базарбаева хан фәсы: – Йихуэй вә җели Сузак районшонди йигә ложынди дянхуа, та вынди, дансы  вә зэ җяҗунни  зэмусы бонгәрни мәю сысый, лоди ё дэ лянзозынима хансы бу дэ. Да җыгә дянхуашон нын минбый, дуәди жын бу җыдо, виса ё дэ лянзозыни зэмусы зунхў йигә лян йигә җунҗянниди җүлини.

Цун дэфуди хуашон нын жүәлэ, дуәди сыҗян да дянхуади жын дусы чиннян, таму кын хәщүә зыҗи фибуҗуәди луәҗүә, йинцы таму ти хэ  хуончүанбинди чинчин-люжын  чон сыҗян занҗиндини. Хан ю бавэди винанди сычинни, юйихуэй җё хуончүанбин ба жын хэди тади щинли җянкон зу бу холи.

Дэфу кә фәди:  – Дансы  вә да танхади хуашон җүәлэ,  ги нэгә жын гихади җедуан бонцу бу гу,  вә йидин ба та вон бинйүанди җунщинни  чинни, зэ җытар щищинди җоканни, пый йүәни зэмусы ги йүәлёни. – Та кә җешон фәди: – Ба щинли җянкон дыйди шынди бинжын вәму йидин шындо бинйүанни канни, йинцы дуәди сыҗян хэ җыгә бинди жын ба зыҗи чүанпин зу набучўли,  бу ю зыҗиди, йүнбуйүнди,  йитян до хи бутынди  зу щи шучили зэмусы зу сыйүн  щёме дўчиди гәёнди җянчёчили.

Дэфу, тичелэ до ташон дин шон щинди  дянхуа, фәди: – Җын җуан шыщин җянйиди сыҗян вә җели йигә 18 суйди щё гўнёнди дянхуа. Та фәсы, тади лозы җянбудый та, йинцы та чынха  тамуди виннали, да җыгәшон до ташон вандё дусы ходи. Да җыгә танхуашон ман нын канчўлэ, гўнёнди щинлибин хэди шынли, вә җинган зу чин та до вәмуди җунщинни. Гуонсы та жүәдуй мә ги чинйүан зэмусы ба хуа мынмынди дадуанли. Ди эртян вәму цэ  по минбыйли, та мә да зыҗиди  дянхуашон да дянхуа… Вә хын щивон җё тади җянкон ходи.

Зуйху Гульмира Базарбаева кә фәди:  – Дю җиншын зэмусы дый хэпа щяца фандуй жынди щинли җянконни, йидин ё щётинди фиҗёни зэмусы янщи гәжынди шынтини, йинцы җы дусы  бохў жынжынди гончёнди  зэмусы ги жынжынди җянкон ги ходи йинган.

«Җы йипян вынҗонсы чечў Европа Лянбонди чянщёнди бонцу шәлүхади.
Гуонсы   цэлё йинви  «Институт гражданских инициатив» щечўлэди, да җыгәшон тади  җын йисы  лян  «Европа Лянбонди» җокан мәю лянщи».

Фанйисы Хуэйзў зэмусы ханйү җунщинди куәщүәжынму йүвын бәшы, җёшу Исхар Шысыр.