Ба Якуб Дигазович Хавазов вә да суйди сыхур зу җыдодилэ. Да 1976 няншон вә зэ «Шыйүәди чи» бошәни лян та зӯтуә хуәди. Зу нэгә сыхур Якуб Хавазов кәҗя донли хын җинянди бянҗили. Тасы ю җышыди, ю да җин-янди линшужын.
Ба дащүә нянванди Р. Лосанов, И. Шәмузы, С. Лолиева, М. Ваахунова, М. Юбузы, Р. Абдулаева, Н. Тянгубер, Х. Лурова ду зэ бошәни гунзуәдилэ. Тамусы Якуб Хавазов тёён чӯлэди, чынха хуәшон нын зычӯди хо журналистмули. Зочян ба «Шыйүәди чи» бо Узбекистан, Хазахстан дэ Хырхызстан җӯди хуэйзӯ жынму ду няндилэ. Дин боди сыхур Якуб Хавазов ба туанти шудо йидани ги мы йигә жын гәли жынвули. Чечў тади линшу бошә нан байир зӯҗыхади җихуа зӯли хуәли, йинцысы ё шу цэлёни, вончӯ ё фон бони, ё чӯчи чуанлянди дин бони.
Зэ дин боди сышон М. Вонахун минщя җунщүәни җё лисыди җёйүан Ю. Баги, хуэйзӯ радиогифәди бянҗи Ю. Лома, Ташкент чынниди куәщүәжын М. Савуров, Пржевальск чынниди чичәчонди линдо Л. Дасифу, Эрдэх щёнҗӯонниди «Дружба» колхозди партия линшу Н. Ибрагимов, Хазахстанди щёнҗяхӯ линшужынму М. Аширов, И. Лоу, И. Манэзов, «Заря Востока» щёнҗуонниди җунщүәди җёйүанму З. Люмозова, Ф. Янлосы, З. Абубекерова зэ д. на да чищин бонли монли. Таму е ба бянҗи Якуб Хавазов жыдоди ходихынлэ, ду ба та тэнэ, донжынлэ. Да җыгәшон няннян ба дин боди жынву на хо чынгун гандо сымяршондини.
Вә җидини, нэ җинян Хырхызстан куәщүә йүанди Дунфон буфунди линшу, юминди лисы бошә Мухамед Сушанло лян «Шыйүәди чи» боди бянҗи Якуб Хавазов ги җё хуэйзӯ йүянди җёйүанму чуанлянли байирди курсли. Зэ җыгә курсшон Хырхызстан җёйүбуди җёщүәфаму лян ю җин-янди җё хуэйзӯ йүянди җёйүанму ги нянчин җёйүанму гуәли шуйили. Йинви җёкуә фубынзы шоди йимяр бянҗи, куәщүәжынму чўди йиҗян, җё җёйүанму ба бошон тачӯлэди Я. Шивазы, А. Арбуду, Я. Хавазов, А. Быйҗонгуйди, А. Совазы, А. Мансурова, И. Шысыр, А. Джон, Х. Лаахунов зэ д. щехади сывын дэ щёфә зэ зыҗиди җёкуәшон лян щүәсынму щищуәди нянни, янҗюни.
Ё фәни, зу нэгә сыхур «Шыйүәди чи» боди туанти лян тади бянҗи Якуб Хавазов чынха хуэйминди җунщинли. Якуб Дигазовичсы цунмин жын, та ба йиче жын лалянди җидихынлэ. Да җыгәшон, Хырхыз гуйҗяди сывынжын А. Токомбаев, юминди хуэйзў сывынжын Я. Шывазы, щеҗя А. Арбуду, лисы бәшыму М. Сушанло, И. Юсупов, йүвын бәшы М.Х. Имазов йүвын куәщүәжынму Х. Бугазов, Ф. Макеева, сынвущүә куәщүәжын С. Малянчинов, щёнҗяхӯ буди зуәгунжын Л. Мадинцеев зэ бошәни кын лэ, таму заён тиму либян танли хуа, щели вынжонли. Вәму, зуәгунжынму чинчир җянли, замуҗя дуә щёнжяхӯди линшуму, җунщүәниди щүәҗонму, җёйүанму зэмусы данлинди жын на заёнди вынти бынвонли Якуб Хавазовли. Та нан зыҗиди нынгу ги йиче гили бонцули.
Даҗя җыдони Якуб Дигазович Хавазовсы Вида Зугуй җонди ветеран. Ви бохӯ Зӯгӯй та мә щитын лилён жынҗанли, зэ жонкуни дэли шонли. Щянли бынсыди йимяр, гуйжя ги та шонли хынще орден дэ медаль. Лян данлин цанҗя жонди жынму йитун, та чинчир ги чиннянму җищёнди, фәли замуҗя нянчин жынму лян йиүнщүн бынсы ви бохў щинэ Зўгўй, җынҗанли.
Якуб Дигазович Хавазов лян хуэйзў щеҗя дэ сывынжынму ви фаҗон дэ каншу замуди вынмин, вули җычян гўзыли. Ба тади бушоди зуәпин, зущён: «Мансӯзы», «Хэчәрди минйү», «Җонзэ», «Цунхуар», «Ту йитян», «Кә җянли» ду тингуә зэмусы е нянгуә. Вә щёнди тади йисы шынди щёфә ги щүан жонди чиннянму ги хо тёёндини, җё таму цунминни, жынйини зэмусы зэ заёнди сышон шончянни, чищинни. Чўгуә җыгә Я. Хавазов хансы ю җин-янди фанйижын, та ба юмин щеҗямуди, җысы М. Шолоховди, А. Фурмановди, Ч. Айтматовди, К. Сыдыкбековди дэ з.д. бушоди зуәпин фандо хуэйзў йүяншонли. Тади вонщёнсы, җё нянҗяму лян чиннён йүян жыншы данлин минзўди зуәпинни.