Дун – яшон хо жын бу зэ шо, кәсы цэнын жын ю фурни. Зущён А.С. Пушкин, Ч.Т. Айтматов, Я.Шывазы дэ хошо данлин ю бынсыди жынму. Ба таму дащё ду жыдони, тингуәли, нянгуәли.

Жыгә вынҗон литу вә вонщён тимәйиха вәмуди нёнлозыни, таму зу зэ цэнын, ю бынсыди жынди фур литуни. Вәмуди нёнлозысы — Панпанзы Шафузы Юсурович лян Панпанзы Меян Сейитовна. Фучин – Шафузы Юсурович зэ Александровка щёнҗуонни сын-ёнхади, зэ җәр җонли, нянли фули, зўли хуәли.

Таму җяни сангә щёхуәзылэ: Сализы, Шафузы, Дунлазы. Вәмуди фучин суйди сыхур  зусы йигә җилю, хуэй лалян жынди линфан щёхуәр, ба та дащё ду тынчонли.

Вәму дадади  абый җяни мәю зыҗиди эр-нурлэ, йинви нэгә абый ба та чинчир вон жяни ханди җё фали, занли. Зу җымуҗя лёнгә җя ба та  тынчонли. Фучин ба абыйди хо  мә вондё.

1936 няншон ба вә дади абый яхали, йиху дадёли.  Тади дама лян сангә цощинхади вава шынхали. Йичыр до дамади ло вәмуди фучин ба таму жоканли.

Кәсы дун-яшон, хаба, зусы жымугә, гуонйин йүнйүр бу гуә: җер чиндини, мер йиндини. Вәмуди дада җён җёшон 9 суй, тамуди фучин вучондёли. Мама лян сангә эрзы шынхали, зу жымуҗя таму шыканди гуәли гуонйинли.

Вәмуди фучин нэхур нянтуә фули, ба фу фиди да щинжин нянли. Нэхур Александровка щүәтонни ба ваму  цэ җёдо 4-хо шон. Та ба  4-хо  няндё кә вудо Садовое щёнҗуонниди щүәтоннили. Җытар  ба 7-хо няндёли. Нан нэгә гуонйин та чынха нянхади жынли. Нэхур щибонгәди жын, дансы йүн вон нагә гуйжя фонди зы дандар, зу вон вәмуди фучин гынчян ләдини. Та ги йиман гили бонцули.

Вида Зўгуй жон 1941 няншон челэди сыхур, ба суйфу гуди щёхуәзыму  тёли бинли. Таму ду бохў Зўгуйли. Ба вә да җяни е мә шоха, ту йигә Сализы гәгә, йиху вәмуди фучин  е дон бинчили. Щянчян до биншон ба та лян хынщезы щёхуәзыму дафадо җё щё командир щүәтоннили. Ба җыгә щүәтон нянван ги та гилигә минтон – сержант. Фу няндё җыщезы щёхуәзы ду шонли җонкули. Таму зэ Курск дифоншон дали җонли. Зэ җоншон ви вәмуди фучин щянхади бынсы  СССР гуйҗя лисы фушон ю җымугә хуани. — Сержант Панпанза Ш. мә дантў, ту йигә җинли дуйтуди блиндаж ба пулемёт задёли, ба җигә фашист дадё, ги хутуди бин ба лў дакэли. Җонкушон  зэсы ба сыйди мин шынха, та зусы мин дади жын.Таму литу йигә зусы вәмуди дада.  Йигә шу мэли еба, кәсы мин шынхали. Зу җымуҗя та хуэйли җяли. Зэсы данлинди нянчин жын, данпа ду сунли җинли, кәсы вәмуди дада бусы нэмугә жын. Хуэйҗя, та диндир мә зуә, та шыканди нянли фули. Нэхурди Фрунзе чынни кэди бухгалтер курс, вәмуди дада зэ җытар дыйли шуйили. Ба җыгы курс няндё, та зэ колхоз зўли хуәли, донли зун экономист зэмусы парторгли. Йиху 1968 няншон та вудо Александровка җунщүәни нянли фули, ба жундын җышы дыйшонли. Гуонйин вончян зы зудини дыйхади җышы бу гу, җыгә йинцышон 45-суйшон вәмуди фучин кә вудо ли Москва буйүанди Балашиха чынниди дащүәнили. Зэ җытар ба вон гони ти җышыди  йи нянди курс на го җягуан няндёли.

Сыхур доли ги та ба җя бангили, щифузы е чүшонли. Тади щифузысы Меян Сейитовна, йигә гуәфон җонди тимянди нужын. Хўда ги таму цыминли шыгә эрзы-нүзы.  Ду җыдони, ба җыгә шыгә эр-нү, хан ё җуадани, хан ё тёёнчын  жынни. Җыгә гункў мә вон фи, таму лёнгә ба җыще сычин ду гандо вифыншонли. Да нүзы — Фаме Шафузовна ба Хырхыз гуйжя университет, физика факультет нянван зэ Александровка щёнҗуонниди щүәтонни зўли эршы җи нян хуә. Лёнгә эрзы — Муса Шафузович, Исхар Шафузович ба Хырхыз щёнҗяхў институт няндёли. Муса Шафузовичсы тугў дэфу, Исхар Шафузовичсы инженер-механик. Таму до җер жызы хан фищин гунзуәдини. Хэмэ Шафузовна ба Арабаев минщя педагогика институт няндё зэ Я. Шивазы минщя щүәтонни зўли хынщезы няндэ хуә.

Халича Шафузовна ба Пржевальск (Каракол) педагогика дащүә няндёли. Тади щуйисы дилищүә җёйүан. До җы вуҗин Халича Шафузовна зэ Э. Эрбудў минщя щүәтонни зў хуәдини. Та җёхади щүәсынму зэ районди олимпиадашон җанди дин го вифын. Ви шончян гункў, ви да җин-ян, зэмусы ви зўди няндэ дуәди хуә ги зымый лёнгә — Хэмэ Шафузовна, Халича Шафузовна ба «жёйү отличник» пэпәр шонгили. Гуон сангә нүзы ги гуйжя, ба йибый дуә нянди җёйүан гункў җүгили.

Сыгә эрзы — Харки Шафузович, Юсуп Шафузович, Якубе Шафузович зэмусы Абдур Шафузович ба кэ чичәди шуйи дыйшон зэ Москва районди автобаза зўли хошо няндэди хуә. Йичыр до  гуйҗя дыйли Дўли жызы, Якубе Шафузович зэ СПТУ № 28 донли җёйүанли. Ло нүзы Харзе Шафузовна ба Москва (филиал) мэмэхон дащуә няндё, чўли мын, җуали эр-нүрли.

Вәмуди гуйҗун нёнлозы ги эр-нүрму җёли хо ёнзыли. Таму зыҗи ю лёнгә хо бинщинни: щиншы зэмусы фищин зўхуә. Эр-нү ба таму җүәзун тали. Вәмуди мамасы «Йинщүн-мучин». Шышон вәмуди мучин зусы җыншы – Йинщүн. Вәмуди фучин ю җигә орден дэ медальни. До вәмуди дадашон дин гуйҗундисы — орден Красной Звезды, орден «За боевые заслуги», орден «Ветеран труда».

Жын фәди: «Ян гуәчи лю шынни, жын гуәчи лю минни». Вәму нёнлозы ба минзы люхали, шындо эр-нуршонли, сунзышонли, чуншонли. Тамусы вәмуди да шоншы.