Мын йигә жын ду ю зыҗиди җищёни. Җысы щинэ Зўгуй – зэ натар та сынёнха зэмусы җон да, щинлянди мучин химин бу шә жә — лын, бу җыдо фа, фанчон ги да бонцуди, шә щинҗи хуа гыншон та да суйсур йичыр җон да, ю миншынди щүәтон, йибыйзы вонбулёди җёйүанму щин лянди ляншуму, пын-юму, щинэди жын…

Җыни сынёнха вава туфын-тусы зу ба щинэди мама җянли. Мама химин, фи да щинҗин тёён зыжиди эрнүдини. Ба суй вавади ганбан та йибыйзы ду вонбудё җысы: ту йигә щёляр, фаншыншыр, щүәди зуә зэмусы зу заза, пый шушур, щүәди шә хуа, тё, чон зэмусы сын гәшы-гўёнди гўсыр. Ложынму ба хуа мә шә цуә: «Сан йүә фан, лю йүә зуә, җю йүә шычелэ ба филуәбу», «Суй вавади гўсыр дуә».

Зу җыму мә җүәчи эрнүму зу җондали. Шон щүә зэмусы ба фу нянвали кә шон дащүә, зэ гэдони лян ляншуму да бишы, зэ лян сыщян ванди лю цоцоршон по… До нянчин жынму гынчян — җысы дин ходи, йибыйзы вонбулёди сыхур. Йинцысы зу җыгә сыхуршон таму чынха ю минлёнди, ю бынсы дади жынмуни. Зу җыгә сыхур нёнлозыму вонщён җё щинэ эрзы зо йигә җүнмый щифур, җё пёлён ятур зо йигә хо нүщү. Хуэйзў ю йигә кулюрни « Ятур шон шы суй, мама шу линсуй», «Зо чү щифур — зо дый ди». «Шә щифур – кан мама, чў җя нүр – кан дада». Зу җымуҗя нёнлозыму чў җя нур ги эрзы зо щифурни.

Җехунди сыхур ги щиннүщү җязышон пыйди хун. Ги щин нүщү пый хун ю зыҗиди шын йисыни. Да пыйхади хуншон нын канчўлэ щинщифурди дуәшо чинчин. Юди жынму кә җымуҗя шәдини: «Хун янсыйди бу – җысы җё гуонйин хо, лю янсыйди бу – ба җёмын донсы». Ги щин чинчинму щиннүщү ё шә сэлямуни, чон жәрни.

Щичәзы җыни до пәпәҗяди мыншон, ляншуму зу дон тамуни. Лонжынму кын шә «Щифур до мын гынчян, хан дыйигә ло ню чян». Зу җыгә сыхур ги щинщифурди җюҗю е ё ги боҗёди чянни. Хошоди щифурму зу вон пәпәҗя сун щинщифурчини. Лян таму йидани е чи ложынмуни. Пәпәҗя ба таму чихади кижынму ё дэчынни. Ба щинщифур линдо фонзыни җе гэтуди суй ятур зу ба гэту җекэли, зыху ги щифур дуан щилянди финни. Линху лёнгә нүжын ё дабан щифурни.