Фәсы, ба йүян жыдоди йүә дуә, жын йүә фуҗү. Дуйдини, йинцысы щянзэди сыҗешон вәё цунмин зэмусы дый данин җышы, ю хо хуә, лин да гунчян, жыншы хо пын-юму либулё җышы дэ йүян. Кулюршон фәди: «Җышы-жынди шы, чянсы жынди данзы».

Щянзэди чиннянму йүнчи да, таму ю нынгу зэ чүан шыҗе дый җышы, щищүә заён йүянни, зыёсы ю щинҗин. Кәсы, лян җыгә йитун заму ё жыхани, бу нын вон фуму йүян зэмусы яндин ё щищүә гуйҗя йүяни. Щинҗин вә лян Милянчуанди вәму хо линҗүди сунзы Зухра, хырхыз йүян либян танхуади сыхур, (вә җыдолэ, тасы жё хырхыз йүянди җёйүан) та фәсы, вәё җы данлин минзўди лисы, куйчын, ё шыканди щищүә жынҗяди йүянни. Ба җыгә хуа Зухра йидяр ду мә фә цуә. Зухра зыҗи зэ Милянчуан щёнҗуонни 1993 няншон лайүә чў 6 сын-ёнхади. Ба Милянчуанди Мансўзы Вонахун минщя җундын щүәтон 2013 няншон на хо җягуан нянван, нянчин гўнён байр вудо Бишкек Жынвын Дащүәниди хырхыз филология щищонли, тади җуанйисы — Гуйҗя йүян (Мамлекеттик тил). Ги вәди вынти, виса нэхур та ба җыгә җуанйи җяншонли. Зухра фәди, зэ щүәтонни нянди сыхур да санхошон вәму дали тур, щищүә хырхыз йүянли. Ба җыгә жёкуә ги вәму Айгуль Дуйшеновна Кунтубаева җёли. Ту йилэ, вә йиха ба җёйүан лян тади җёкуә каншонли. Айгуль Дуйшеновнасы ю җин-янди хо җёйүан, та ба җёкуә ги ваму пәщёди минбый, ги мый йигә щуәсын лю шындини, ба ваму канди, җё вон хонни щени, нянни, дун хуади йисыни. Ди эрлэ, да 8-хо до 11-хо вә зэ Айгуль Дуйшеновна гынчян җуанмын щүәли хырхыз йүянли, нэхур вә зу ба җуйи надинли, йиху щён дон җё хырхыз йүянди җёйүанни.

Зухра нансуанди ба дащүә нянван, җуанхуэйлэ зэ зыҗиди щүәтонни лян щинэди җёйүанму йиданни дон туншыму, гунзуәни. Йинцысы, нан тади хуа, зэ дащүәни нянди сыхур та зу минбинли, виса до хуэйзў щүәсынмушон хырхыз йүянди җёкуә нандихын, та сылёнли замуҗя ё ба җёкуә шәлүни, нан са җёщүәфа лўфу ги җёкуәни. Вон дащүәни вуди сыхур бушоди жын донли тали, фәсы җыгә җуанйи до тащон нанни, кәсы Зухра йинавар сыщёнли ложынму фәхади хуали «бу кў, замуҗя тянни». Җыншы, зэ дащүәни нянди сыхур, Зухра зуәли нанли, лян та нянди нянчин жынму дусы да дунфон-нанфон дифоншон лэди, таму фәди заёнди хырхыз фон-ян., та ба юди хуа йисы бу дунлэ. Кәсы, ваму тинҗян тасы хуэйзў гўнён, щянчян чёчили, йинцы, Зухрасы луәму йигә щищүә гуйҗя йүянди гўнёнлэ. Йиху таму ду нанчў хо щин гили да бонцули, җёйүан Садыралиева Гульджан е йинавар фубонли тали. Дащүәниди щиҗон Кенжениев Каныбек Дуйшеналиевич канҗян, замуҗя хуэйзӯ гӯнён танщин щищүә хырхыз йүяндини, фанчон, щихуанди куаҗён Зухради чищинли. Нянчин гӯнён 2016 няншон җели хунли, кәсы ба нян фуди сычин зун мә тын, чечў нёнлозымуди, җёйүанмуди, пын-юмуди фубон Зухра Лома на хо җягуан ба Бишкекди Жынвын Дащүә нянван, доли зыҗиди щёнҗуонни ба щинҗин фишон, ги щүәсынму җёли хырхыз йүянли. Җинтян Зухра ги та гили бонцуди жынму чынщин дощедини. Гунзуәди сыхур та шоншыли, щихуанли, йинцысы нансуанхади вонщён чынли. Щянзэ Зухра ба щинэ йинган тынхали, җуа лёнгә суй нүрдини. Ё фәни Зухра, чўгуә ган җяҗянди хуә, җуа вава, хан вонщёнди вон Хырхыз Республикади Минзў куәщүәйүанди аспирантура литу вуни, хырхыз йүан либян ще лунвынни. Ба җыгә йиҗян, тади нүщү, лёнханниди нёнлозыму е фубонли.

Вәму щинфуни, җымуҗяди ю бынсыди чиннянму, зущён Зухра, нян куан, зы вончян шыканни зэмусы яндин ба зыҗиди вонщён гандо сымяршонни. Ги ни, Зухра, вәму чынщин панвон, җё вончянди йиче сычин йидин чын.

Фатима Хавазы. Хуэйзў зэмусы ханйү җунщинди куәщүәжын, йүвын янҗюҗя.