Җинянди Гурбани эди зэ җӯма йитянни, зэмусы Җюйуә чӯ йи, җышы жызы е зэ җы йитянни. Йичеди щүәтон ба мын ги щүәсынму кә щихуанди кэкэли.
Вәмуди Александровка щёнҗуонниди ту хо җунщүә ба Ясыр Шывазыди минтон дыйшон җы зу кәҗя эршы йи нянли. Җё вә фәчи ги вәмуди щүәтон ба замуди вида сыҗяди минзы мә ги цуә. Йинцысы вәмуди җёйуанму ду ю годын җышыни, хан ю җигә ю лёнгә годын җышыди җёйуанмуни. Линйирди җы сан-сы нян литу вәмуди щүәтонни җинлэди ту хо класс дэ нулевой классди щүәсынму би фон чӯчиди җю хо дэ шыйи ходи щүәсынму дуәюди лён-сан лэзы. Вәмуди щүәтонни нын чынха җюбый эршыгә вамуди вифыншон җинян кәжя чынли йичян санбый эршыгә щүәсынмули. Җёйүан туантиди фур е да саншыгәшон җондо сышы вугәшонли. Да нянсыгә вәмуди йигә нулевой классди щүәсынму на хырхыз хуа щищүә жёкуәдини. Җинян таму шонли ту холи. Вәму кә кэли йигә щищүә хырхыз йүянди нулевой класс. Вәмуди щүәсынму зэ нян фуди сычиншон е танщин, е ю бынсы. Билүн: няннян зэ районди олимпиадашон хын җи ёнзы җёкуәди ёнфашон щүәсынму җанди ту йигә, ди эргә дэ ди сангә вифын. Зущён 2016 няншон зэ 10-хо литу нянлиди нүщүәсын, Шарипова Алия, зэ областди олимпиадашон ба ди сангә вифын җаншонли. Та ба йинйү җыдоди хо. Йинцысы та зэ щёнжуонни кэхади «Language school» литу щищүәли йинйүли. 2017 нянди вуйүәни 8-хо «Б» класс литуди нүщүәсын, Давузова Алия, зэ «Билим кана» щүәтонни гуәли республикади йинйү олимпиадашон зэ 8-хо җунҗянни ба ди эргә вифын җаншонли. До вәмушон җысы да щихуан сычин.
Няннян сыйүәнни Турция дэ Хырхызстан лянхәхади лицей литу җё 6-ходи щүәсынму гуә кошудини. Җы зу хын җи нянли вәмуди лён-сангә щүәсынму на го җягуан ба кошу гидё, зу зули тамуди лицей литу нянчили. Вәмуди щүәсынму лян дый җышыди сычин йитун хан ю чонди, тёди, фә сывынди дэ фа пинпинди бынсыни. Билун: няннян «Сары Озѳн» пинпиншон вәмуди щүәсынму ба тамуди бынсы щянчӯлэ хан зэ районди дэ областди пинпиншон е цан җядини. Нянсыди сыйүәни Сварова Ащиян Юсуровна зэ ги Эрли Эрбуду йибый суйди сынжыр җүхади пинпиншон ба вугә щүәтонниди 4-ходи щүәсынму шудо йидани зэ вынмин дян литу гуәли «Вәди чиннён йуян» бисэли. Александровкади сангә щүәтон, Садовое щёнжуонниди йигә щүәтон зэмусы.
Минлянфан щёнҗуонниди Вонахун минщя щүәтон литуди щүәсынму щяпан цанли җяли. Кәсы Ясыр Шывазы минщя щүәтонниди ваму ба ту йигә вифын җаншонли. Ба җыгә щихуан сычин зэ замуди «Хуэймин бо» мянзышон е щегуә. Зу йинви нэгә вә шоншыди фәдини: «Ги вәмуди щүәтон ба вида сыжын Ясыр Шывазыди минзы мә нан цуә». Вәмуди җёйүан туанти дэ щүәсынму ба щүәтонди миншын хан вон гони вонщёнди тини.