Жын зэ шышон хуәди йибян, ба хо миншын ё люхани.
Йиху дансы чүли шы, җё жынму фә:
«Җыгә хонзыни, җыгә фонзыни зочян җўли йигә
жын – җысы та зэхади фу, вахади лў, щюхади чё».

---

Эрли Эрсазович Эрбўдўсы 1917 нянди җынйүә 20 зэ Хырхыз ССРди Москва районшонди Александровка щёнҗуонни сын-ёнхади.  Зу зэ җыгә щёнҗуонни бу манфуди щүәтонни нянли фули. 1941 няншон ба та тёли бин, дафадо җоншонли. Та бохўли Ленинград чынпули. Вида Зўгуй җон даба, та җуанхуэйҗя зэ Фрунзе чынниди Минжын җышы Бушон гунзуәли. 1946 няншон та вудо Алма-Ата чынниди вэгуй йүян щүәйүан литу нянли фули. Йиху да 1949 няншон йичыр до 1957 няншон зэ щүәтонни донли җёйүанли.

Да 1957 няншон до 1977 няншон Эрли Эрсазович зэ «Шыйүәди чи» боди бошәни гунзуәли. Зу да нэ йинян дашон та щетуә вынщүә зуәпинли. Җыще нянщян литу Э.Эрбўдў щечўлэли хынщезы зуәпин — җысы «Гўнёнди вонщён», «Нүжынди щин», «Щемый щёнтун», «Маҗяди щёхуар» дэ данлинди щёфә. Лян ло гуонйин сынхади ха шынбазы җынҗанди, ви щин жын, щин гуонйин, щин жынли-дэдо, йидани фи гункў – дусы Эрли Эрбўдў щёфә дэ җунпян щёфәди йисы. Ба ло гуонйиншон хуэйзў жын гуәхади чүннан гуонйин та щеди е чёдихын. Та манли щели 80 щёфә лян җунпян щёфә. Эрли Эрсазович Эрбўдў гуон бусы ги хуэйзў вынщүә, ги Хырхызстанди дуәминзўди вынщүә литу ба зыҗиди шын җүәзун лёхали. Зэ фаҗон хуэйзў санвын литу та җандисы зэчян вифын.

Лян ще щёфә, җунпян щёфә дэ чонпян щёфә йитун, щеҗя хансы хо фанйижын. Та ба А. Куприн лян А. Чеховди, А. Толстой дэ М. Горькийди, М. Ауэзов лян Ч. Айтматовди хынщезы щёфә ду фандо хуэйзў хуашондини. Эрли Арсазович Эрбўдўсы СССРди щеҗя Лянбонди йүан, Хырхызстанди щеҗя Лянбонди йүан, Хырхызстанди журналистика Лянбонди йүан.

Эрли Эрбўдў 1986 няншон чүли шыли, ба та зэ Александровка щёнҗуонни сундёли. Вуҗин ги җыгә щёнҗуонниди ди 2-хо щүәтон ба тади минзы нангили.

ЙИСЫ ТЭ ШЫН

(Ги вәди баба Э. Эрбўдў)

Йүян тэ чё, зуй ю нын,

Хуэйзўди кулюр җыди шын.

Ниди щёфә йисы шын,

Дансы нянли, зуан жын щин.

Бый Ёнхў ни щеди җын,

Масанчынсы хо йинщүн.

Җысы хуэйзўди җынҗы гын,

Заму бу вон, җидо щин.

Җуәҗун нүжын тэ нэ тин

«Щёмый щёнтун»,
«Нүжынди щин»,
«Гўнёнди вонщён»,
«Мэҗерди нын»
Җыще фуди гын тэ шын.
Чонкэ чүзыли шын тэ лин,
Фәкэ хуали йүян шын.
Жынжын йиче ду нэ тин,
Нисы хуэйзўди йиза дын.