Җысыма, хуэйзўжынди вынмин сынхуәшон кә йүли йизун щихуан сычин. Бишкек чынниди «Аргус принт» чўбаншә фончўлэли йи бын на хуэйзў йүян щехади щин фу. Җўзоҗясы — Хазах Республика Аухаты щёнҗуонди ю да җин-янди җё хуэйзў йүан дэ вынщүәди җёйүан, Җинлиров Мэхар Харсанович. Ба тади минзы нянҗяму җыдоди хо, йинцысы «Хуэймин боди» мянзышон ба Мехар Харсановичди сывын дэ щёфә чинчир вончў тадини.

Ба «Ганҗин щин хўшанха» фубынзы надо шуниди сыхур вәди щинни гощинзали. Виса гощинли? Йинцысы вә чинняр кә җянли хуэйзў сывынди фаҗонли, җиргә вә кә юли на фуму йүян нян сывынди нынгули, зэмусы җиргә вә кә нын футанди җы чиннён янди җычян, фуҗү дэ җүнмый. Вә нэ нян Мэхар Харсанович щехади сывын дэ щёфә. Тади хуа чё, щеди лянҗү. Ё фәни, щин сывын фу литуди йиче зуәпин ю йисы, тиму заён. Җысы – щинэ Зўгуй, мучин, зохуа, хуэйзў минжын дэ тади лисы, куйчын, щёнщү зэмусы данлин тимуди сывын. Җўзоҗя щинэ зыҗиди хуэйзў йүян. Канлэни, тади дин дади вонщёнсы җё хуэйзў жынму ба чиннён ян каншуди ги хубый люхани. Ба сыҗяди җыгә зывон зэ «Чиннён йүян» сывыншон канди щяндихын:
Чиннён йүян дуәму җүн,
Линдор йиён,
Ба ни тинҗян вә гощин,
Шыҗе йүә лён…
Нисы вәди да шоншы,
Вәди гуонлён.
Җё ни бә җў фаҗонди,
Щён чин фи тон.
Зўгуй тиму зэ җыгә фубынзы литу җанди вифын е да – җысы «Хазахстан – вәди Зўгуй», «Йинпан», «Вәди Зўгуй» зэ данлинди сывын. Мэхар Харсанович на жәщин бёфә гәҗяди чин Хазахстан гуйдини, бёфә тади чиннэ щё Зўгуй – Йинпан щёнҗуондини:
Җир вә кә до Йинпанли
– Вәди Зўгуй,
Щин да куни тёдини,
Щён вончў фи.
Канҗян ни, щён дашын хан:
– Хома, Йинпан!
Җысы, вә кә хуэйлэли,
Щён ба ни җян!
Доли җәр, вә бу зуә чә,
Бущин нэ ло.
Гәло-гуэҗүәр ю җищён,
Задый нын вон?
Җўзоҗя зэ тади щин сывын фу литу ба җигә зуәпин җүги лохуэйхуэйди лисы Зўгуйли. Хуэйзўҗынму доли Хазахстан җы зу йибый сышыҗи нянли еба, кәсы таму ба зыҗиди «ло җя», лисы Зўгуй, йибыйзы ду вонбудё. Зэ «Җиха, нисы лохуэйхуэй» сывын литу та щеди: Ее кын ги сунзы фә:
– Җиха, нисы лохуэйхуэй.
Ниди зўбыйсы мәмин,
Лисы Зўгуйсы Җунгуй.
Щиан-вәди чин чынпу,
Йитян ба та ду бу вон,
Химин зэ вәди щинни,
Зуди, занди ба та щён.
Ба «Ганҗин щин хўшанха» фу щихуанди нянгуә, вә җиргә щинни җынбучўди ба гәҗяди йиҗян җедуан щелиха. Җыгә фу литу мый йигә сывын җүнмый, ю йисы. Таму җё нянҗяму щинни гощинни, шинэни, шоншыни, фа юцуни, сылённи… Йиршон вә на жәщин ги Мэхар Харсанович панвон данин гончён, җящяди пиннан, зуә чёмё сывынди хуәшон дый да чынгун.