МАМА… җы йиҗү җүнмый хуа до мый йигә да-щё жыншонсышы, җиншын, либулёди гуйҗун жын!
Да 2012 няншон Хырхыз гуәҗя вуйүәни ди сангә екшанбе гуә Мучин жызыдини. Җыгә минлён җечишон Хуэймин щехуэй ба хырхызстанди йиче мучин зэмусы фунү гунщидини! Панвонди җё ниму ду гончён, щихуан, җё йүнчи, пиннан, щёляр суй ниму, җё эрнүму фанчон щёчун, тэнэ нёнлозымуди.
ВӘДИ МУЧИН
Ни на щинще җуали, тёёнли —
Вәди мучин.
Ни зэ хуәни вули на жә щин —
Вәди мучин.
Ни, тынчонли зущён мин —
Вәди мучин.
На шынти җә фын, дон йүли —
Вәди мучин.
Ниди быйнэ би са ду гуйҗун —
Вәди мучин.
Җисы ба нынчин бушонни —
Вәди мучин.
Данпа бубушон, җон хуанбуван
Вәди мучин.
Ба ниди хо щин, вә бу вон —
Вәди мучин.
Шышон зыю ни җүн-ён, гуйҗун
Вәди мучин.
Айша Мансурова.
ГИ МУЧИН
Ама, вә зэ шышон хуәдо ло,
Ба ни бу вон.
Щин, зущён суй вавади,
Гуон ба ни щён.
Хан, зушён суйди сыхур,
Щён жё ни го,
Щён зэ ниди хуэвәни
Щётин фижё.
Вә щён зуәдо ни гынчян,
Жә шу дэчў,
Ба ту гәдо жязышон,
Җинжин нэчў.
Җё ниди лёнгә мо нянҗин,
Зочян йиён,
Ба вә тынди, кангўни,
Ги вә жо лён.
Ниди чё шу жуали вә,
Задый нын вон?
Хуәдо жисы, мучин-а,
Щин нын бушон?
Җыдо, ба ни зэ бу жян,
Щинэди ма.
Йищин ни до «ло жяли»,
Ба вә лёха.
Кәсы щин зун бу дайин,
Суй ва йиён:
Ба ни, щинэди мучин,
Фанчон вә щён.
Мэхар Җинлиров.
МАМА
Мама ба вә сын-ёнха,
Чыли бый нэ, та ю жуа,
Зущён чимян та щифа,
Вә ма бошон го вава.
Шыже ташон дуә куанда,
Сан фан, лю зуә, җю папа,
Вә ма щнхан ба вә жуа,
Шыэргә йүәшон жё мама.
Вава зущён модан хуа,
Дада, мама ду нэ та,
Шышонди бобый — суй вава,
Щинни тынди жё жон да.
Вә ма ба вэ годи жуа,
Ги нэ, хуан йи вә җонда,
Җонда вә ба Зўгуй ба,
Дуйту бу нын хуайүан та.
Вәди суйфу җё шыба,
Зущён кэфанди да хун хуа,
Минжын канжян ду нэ та,
Гўнён щинэ гуон вын хуа.
Вә жон дали йинщүн дон,
Зущён фичин зэ тяншон,
Вә кандини го саншон.
Йүанзы ю лю, хуар ю вон!
Ходинима, вәди нён!
Ни чыли, шынти тончён,
Вә е чыли лян ни йиён.
Заму лонни зэ го саншон.
Ниди щинчон вә мә вон,
Җидини зэ вәди щиншон,
Ба вә щихан, е тынчон,
Вә җон дали, щинэ нён!
Лян ни гощин саншон зуә,
Сан ю голэ, лў йүандё,
Чон лў зан дуан, җё сан жуан,
Дун-нан, щи бый ду канҗян!
Хусе Маке.