ҖИВАР  ҖЁМИН

Щиларҗя ю йи вә җивазыни. Щилар тянтяр-вумый ги таму са шы, ги фидини. Юйихуэй та зэ цывикэли, нана кын годо:  Куэ, дандар, чи ги җивар сагищер шычи, җонда заму бу чы жума.
Зу да җыму гуәли хошо жызыли. Җивазы е җон дали. Щилар хан ги таму са шы, ги фидини. Нана зу да нэму го сунзыдини.
Нэ йитян Щилар лян ваму фадини, нана кә годо тани, та мә дунтан. Нанади чи шонлэли:
Ни чинима, хансы бучи?!
Щилар дюди лёнлёрди, зу шәли:
А нана, заму җисы зэ җивазыниса?
Хан суйдини.
Щилар лалигә кўшыр:
Хы-ын, дуә дали…
Хан мә җёминни, гуазы.
Мә җёли мә җёчи …
Мә җёминди чыбудый. Щилар сымулихар кә шәли:
А нана,  таму хабасы яба?…

М. Имазов.

ХОХАНЗЫ ЯВАР    

Ңәди линҗя канли хошо суй явазы.
Тянтяр ганзо ңә люшын ги таму гиди йи дезы тонхади фузы. Явазы җыни подо дезы гынчян, йигә да ммалар зу фидилэли. Җё бонзыди пялалади щёшын хади, явазы луан зу потуәли. Малар луәдо дезышон, ба шы шонйиха, зу фидёли. Явазы чын йитянҗя бу зэ дезы гынчян чили.
Хушон ңәди линҗя бусўщинди, шәди:
Замуди явазы, хаба, бухаханли, за бу чыса? Та бу җыдосы, явазы тянтян шу нәдини. Нэ йитян дыйдо нанидигә суй явар подилэ, хуәдо ңә линҗяди явазы  чүн литули.
Явазы луан ду ханди ги та шәтуәли:
Җытар ю маларни. Малар динни.
Явар ги таму фәди:
Нимуди данзы тэ щёдихын. Миргә та зэ фидилэ,, ңә зу ба та җуйдёни.
Ни кә мэ зуйни, — явазы луан ду ханди.
Ди эртян ңәди линҗя,  зулян тянтян йиён, ба шы налэ, гәха, зудёли. Явар шоншыди шәди:
Ниму канди, җыхур ңә лян малар җынҗанни.
Та хан мә шәванни, малар кәҗя фидилэли. Явазы луан ду потуәли, кәсы йигә суй явар мә хэпа, диндир занди дындини.
Малар хан мә луәдо дезышонни, җё  явар ба та чо бонзышон нёчўли. Малар занлигә җин, да яварди зуйни ба хуэдёди бонзы дынчўлэ, щищир фибузули.
Җыгәди зыху малар зэ мә лэ. Явазы цэ чыкэ шыли.

Э. Быйҗонгуйди.