Лохý дэ хýзы
Йигә лохý кын җё есынму зэ фулинни шу йицуанзы. Есынму шуче, лохý ба йигә есын җянди зу чышонли. Цун җыгәшон есынму зуәлигә хуэй, замуҗя таму ба лохý дуәтуәни.
–Вә зыҗи зэ лохý гынчян чини, ба ниму ду даҗюхани,-йигә тýзы фәли.
Есынму ба тýзыди хуа тинҗян, щёли:
— Хын, ни кан җыгә җуонвонгуй тýзы фәди са?
Тýзы җыдосы лохýди дýзы вәди сыхур доли, зу лонлон- бэбэди чили. Лохý ба тýзы канҗян, хухуди фәди:
-Ни за лэди җыму цы?
Тýзы хуэйдади фәди:
-Вә линди фи есын ги ни сунлэни, кәсы лýшон җё данлинди йигә лохý чышонли. Тинҗян җымуди хуа, лохý хули йишын:
-Ни ги вә ба нэгә лохý зыйиха, та да нани поли.
Тýзы ба лохý линдо йигә кý җин гынчян фәди:
-Зэ җытарни, җин литуни.
Лохý бадо җин яншон вон литу йиканса, йигә лохý зэ фишонни. Лохý ба фипиршонди йинйинзы канчын далинди лохýли, йигә җонзы тёхачи, янсыли.
Есынму ба җыгә йинщүн сычин җыдолиди сыхур, гощинзали. Таму ги тýзы доли да щели, ба та җёчын йинщүнли.
Фичинсы замуди җи пын-ю
Ба фичинди вәвәзы годи бә цыйдёли. Фичинсы тандониди, гуәйүанзыниди, цэйүанзыниди дин җыншыди бохýҗя. Фичин чы хэхуә мочун дэ заёрди чунчунзыни. Фичинсы замуди җи пын-ю. Ба фичин ё хýшанни! Заму җýди дифоншон фичин хын фузадихын. Жысы бангәр, быйлир, вугынцыр, гәзы, лова, мачёр, нанчун, хан-яр, шытучёр, щичё, щүәлова, янҗир зэ данлинди.
Сангә ланганшу
Йигә дифоншон ю сангә ланганшуни. Таму йигәр ган йигәр лан. Йихуэй сангәр шонву зэ готянйүанзыниди гуәфу диха щехуанили. Фушонди цуанпынпырди гуәзы зыгәмуди нэдо тамуди ляншонни. Йигәр фәди:
-Зудый җё җыгә гуәзы дуандуарди дедо вәди зуйни.
Ди эргә фәди:
-Зудый җё нэгә гуәзы чынха куэкуэр дедо вәди зуйни.
Ди сангә фәди:
-Ниму фә җыще хуа бу щян фама?
Минжын сывын
Бяндар бян щилюлю,
Лянхуар дедо фи литу.
Вә ги лянхуар бэ сан бэ,
Фоншар мын дан шан кэ,
Литу занди ёнэнэ.
Ёнэнэ ёнхади эрзы хуэй ще зы,
Ёнхади нүр хуэй за хуа.
Даҗе залигә моданхуа,
Эрҗе залигә филянхуа,
Дюха Санҗе бу хуэй за,
Йи за, залигә щянгәда.
Йүәлён
Йүәлён, йүәлён
Җянҗян го,
Чи бый ма,
На да до.
Да до чон-
Са йигә ён,
Ён мә ще-
Са йигә бе,
Бе мә дан-
Са йигә ян.
Ян мә ю-
Защезы махуар цылулу.
Ни йигә, вә йигә,
Ги нянфу вава
Лю лёнгә.
М. Джинлиров җунбыйхади цэлё.