Вида Зўгуй жон йинян ган йинян ли заму йүанли. Совет минжын зэ нэгә дэдў жоншон дыйли шын жиннян кәжя 75 нянли. Няннян вуйүә чў жю ба Дыйшын жечи чүан шыжешонди йиче жынму гуәдини. До Хазахстан дэ Хырхызстанди мый йигә жыншон вуйүә чў жю есы гуйжун жыэы.
Заму ду жыдони, бонжер сы нян литу гуон совет минжын зэ Вида Зўгуй жоншон дюшәли эршы жигә миллион жын. Зу нэгә винанди сыхуршон вида гуйжя литу жўди йиче минзўди дэбёму зэ йүхади дэдў жоншон щянли эыжиди бынсыли. Таму литу хуэйзўжын е бушо. Хазахстан дэ Хырхызстанди сычян дўә лохуэйхуэй е цанжяли жыгә жонли. Таму мә щитын гәжяди гончён лян мин лян фашистди жёчёнжяму жынжанли.
Лохуэйхуэйди жүнзыму зэ йиманди жонкушон е йинйүнди бохўли зыжиди Зўгуйли. Зэ жыгә сынза жоншон хуэйзўминжынди хоханзы эрзы Мансўзы Вонахун чынха Совет Лянбонди Йинщүнли. Дыйли орден лян медальди жын е бушо.
Гуон да Кордай районди Каракунуз (щянзэди Масанчын) щёнжуонни 300 дуә лохуэйхуэй шонли жонли, жыгә фур литу бонжер 200 жын мәдый жуанхуэйжя. Таму ви бохў Зўгуй ба зыжиди мин тепыйшон, йүнжю шындо жонкушонли. Ви щянха данзы дади бынсы дуәдуәрди жүнзыму дыйли гуәжяди орден лян медальли — жысы Каракунуз щёнжуонниди Джаншанло Суваз, Имаров Вур, Чонтей Гуйлин, Санва Суваз, Двумаров Гадиз, Уджур Сулей, Гуаров Харсан, Хуров Исхар, Сибо Данва, Сибо Хур, Сваров Арбуду, Исыр Манар, Беква Сулей, Беква Бар, Лилизов Сулей, Вайсыров Харки, Улюров Юсуф, Меваз Мар, Шаров Дау, Ясыров Юбур, Хусар Щива, Гейсыр Лю зэ данлинди, Шортюбе (вужинди Сортобе) щёнжуонниди – Хия Яр, Айдыров Хия, Чубаза Исмаил, Дауров Щимар, Щилязов Салихар зэ данлинди.
Ду жыдони, Дыйшын жызы – жысы нянлуй ян щинди жечи. До жиргәди жызы хан зожуә жоншон шәхади, зочян мәю сыса йинщёнди жүнжынмудини. Щинжин Жямбыл областьшонди Общественное объединение «Парыз» зэ Белоруссия зожуәли 562 шәдёди жямбылжяму, жыгә фур литу 28 солдатсы Кордай районшонди. Жы 28 кордайжяму литу 7 жүнжынсы лохуэйхуэй: жысы да Масанчын щёнжуонни зули жоншонди Шерба Бакир, Дива Хор, Тумаров Исхар, Дыва Хахар, Суров Арли зэмусы да Сортобе щёнжуонни доли жонкушонди Суров Юнур дэ Матжигуев Шали.
Вуйүә чў жюсы Хазахстан дэ Хырхызстан минжынди да жечи. Жы йитян гәдо-сычўр гунщи Вида Зўгуй жонди ветеранмудини, лошо, наннү лян таму йүмяндини, на жәщин ги дощедини. Жиннян йинви коронавирус жынму е мәю нынгу, зущён няннян дажя хунхун-хуәхуәди шудо да чонзыни, йидани жейин Дыйшын жызыни. Зусы жыгә еба, мый йигә жын лян тади жящя зэ зыжиди жяни гощинди, щинни шоншыди хан гуә жыгә минлён жечини – йинцысы заму дусы дыйшынжямуди хубый.
Вужин Хазахстан дэ Хырхызстан Реслублика литу бохўли Зўгуйди жүнжынму шынха йидярли. Таму йиман фангуә 90 суйли, гончён е мәю нэму холи, дуәдуәрди ду биндини. Йинви жыгә гуон бусы Дыйшын жызы жы йитян, тянтян – вумый ги таму ё люшынни, ё ги либулёди бонцуни. Жысы дажунди жонзэ. Йинцысы Вида Зўгуй жонди ветеранму ба дин жычянди гунло зынхали – тамусы дин сынза зэмусы дин дэдў жонди Дыйшыжяму! Ю лёнщинди хубый ба зыжиди йинщүнму йүн бу нын вон.
Вуйүә чў жю ду жини: ложә, пинбый.
Бә вон щүнди лян зымый, ниму е жи.
Ло мучин хан кўдини, дуәшо нянлуй.
Зун мә вондё гуәлиди, жи щин, залуй.
М. Джинлиров, Казахстан.