Мә җүәчи лын дун е гуәли. Тянчи йитян ган йитян нанхуәли. Жәтуди җин гуон е юли җинҗонли, җуәҗун доли шонвуди сыхур та сэди җё туанйүарниди щүә зу щётуәли. Щёхади щүәфи маншонхани ду людини. Кәсы до хубар, тянчи кә зу лынли, йитян щёхади щүәфи шудо кынкырни, чүчүрни кә зу дунчўли – чынха минмирди чин бинли. Ложынди хуа мә фә цүә: «Чи җю, ба җю долэли – кэчур бу йүан.»
Җысыма, гуәли җи тяр кынкыр литу фи е мәюли, хонзыни ган лўлўр е чўлэли. Ёнпәни, лў бонни, чүяншон цо мёмёр, зущён җын җянҗяр йиён, люйинйирди кәҗя нян хун тэёндини. Чёчёр хуанлуәди йигә нян йигә, гощинди фитуәли. Җысы са? Җысы Анлахў Торля ба зохуа кә җуандо җүнмый чунтянди сыхуршонли.
Җүнмый зохуа фәбуван,
Та ба шынҗе чё дабан.
Чунтян җеҗе до мянчян.
Йүнчи, гощин мә бян – ян.
Суй бый щүәхуар кэкэли,
Мә па лын, бынчў димян,
Җандудур щүә җунни зан,
Та няннян җейин чунтян.
Щёнҗуонни ганзо йизор зу нын тинҗян ёнгорди, нюварди җёхуан шынчи. Хонзыни, йүанзыни хынзыди фушон хуар бобор болынлынди нянкан бекэни.
Люфу еер чўлэли, зыю та чин,
Җыҗыр вонха дёлади, канчи тэ җүн.
Зущён гўнён дэшонли йитё хуон җин,
Ганзо фищин җян тани, йичў фонмын.
Зохуади җыще гэбян зущён ги жынму дэ йичеди хуәвәр тифәдини: «Куэщер чўмын, җейинлэ, зэ бә танман! Ниму куэщер ду җейин җүнмый чунтян!» Дуйдини. Сыхур бу зан. Зусыди! Сыхур йи фын җўн ду бу зан. Сыхур бу җў фидини. Та зущён җиргәди чунтян бу җин, бу ман кәҗя доли мый йиҗяҗярди мыншон котуәли:
Сыхур ни фонгуәли,
Щён чы бый мян.
Чунтян фишон долэли,
Зэ нянмянчян.
Куэщер щя кў, бә тынли,
Сыхур бу зан.
Хўрҗя чў тан, бу хуэйҗя,
Ди тушон җуан.
М. Джинлиров.
СЫЙҮӘ
Җён тянчи хуанлуәдини,
Җён чин нянлуй дё,
Җён тэён са гуондини,
Җён хин йүнцэ пё,
Җён финёр җёхуандини,
Җён ямир-дунҗин,
Җён щиннй щё мандини,
Җён ю дуәму бин…
ЧЯНМЯН ЖӘ ЧУНТЯН ХОНЗЫ…
Чянмян жә чунтян хонзы,
Чынпу җын фищин,
Чун фын вынцун гуадини,
Чисый хын ганҗин.
Чунтян видо луәдини
Вон җуви кә цын,
Вә йихур җынжыр щи зуй,
Гуәлэ-гуәчи пын.
Хуәдо жынжын хуәзыни
Щин цэ дый нанвын:
Дуәшо щихуан лён лянмян
Шыщин дуан щинвын.
Вон натар җүә зудини,
Чуанпин мә гуанщи,
Йинцы ту литу мә йи,
Кәсы щин хуанщи.
И. Шысыр.