Ни хома гуйҗун щүǝтон.
Вǝ йи  щя ба ни сылён.
Җүнмый щятян фигуǝли.
Җюйүǝ чў йи кǝ доли.

Җюйүǝ чў йи чʏан шыҗешонди щүǝсынму дэ дащүǝсынму шон щʏǝчини. Александровка айыл окмоту диҗешон ю  вугǝ җундын щүǝтони: сангǝ зэ Александровка щёнҗуони, йигǝ зэ Крупской, йигǝ зэ Беш-Кѳрук щёнҗуони. Манли  зэ җы вугǝ щүǝтон литу нянди бонҗер сы чян щүǝсынму. Хырхыз, хуэйзў, вурус, хазах, визў, ханзў, таджик, турк, немец зэ данлин минзўди ваму ду зэ лёнхуǝ щүǝтонни дый җышыдини. Йиче щүǝтониди җёйүанму ю годын җышыни. Таму ба да щинҗин фишон тёён вамудини. Лян ги җышыди йитун, хан цощинди җё мый йигǝ щүǝсын фаҗон зыҗиди бынсыдини. Вǝму айыл окмотуди зуǝгунжынму кын чинди җё щүǝсынму зэ заёнди җечишон щян тамуди – чонди, тёди зэ данлинди бынсыдини. Билүн: гуǝ Нооруз җечиди сычин чынха хо  куйчынли – мый йи нян сангǝ щёнҗуон йигǝ ги йигǝ җёдэгидини. Җинян  Крупской щёнҗуон ги Беш-Кѳрук ба чүанли җёдэгили. Щүǝсынму зэ гуǝлиди йиче банфашон цанли җяли. Таму хан зэ щя щёнчи дэ тёчи бисэшон цан җядини. Зэ йичеди банфашон чиеҗя ги да бонцудини. Җысы Лумаза Халича, Шамуза Рахим, Шарипов Абдулла дэ данлинди.

Зэ Крупской щёнҗуони 2006 няншон нянванди щүǝсынму: Бейшенбаев Улан, Заваза Руслан, Мамбетов Аман, Насыров Ильдар дэ Щепинов Юрий ги щүǝтон дуанли шылюгǝ дянгуон. Таму чинди җё ла дянчиди Леджеба Ибрагим ги  җунщин хонзыни ба хилиди дянгуон ги сыганшон лашонли. Щёнҗуони җуди жын до да щедини. Да җыгǝшон канлэни щүǝсынму ба җёли тамуди җёйүанму дэ щүǝтон мǝ вондёди.

Гуǝлиди җёщүǝ няншон вугǝ щүǝтони фончўчили 92 шыйиходи щүǝсынму. Таму литу вон да щүǝни вули 29 ваму, вон щүǝщё дэ җичийүан литу вули 20 ваму, җысы 53%. Щяшынхади ваму нян заёнди щүǝчындини, були зў хуǝдини. Вǝмуди щүǝҗонму дэ җёйүан туанти ги йиче минжын пащён быйсуйди гончён, тяндади йүнчи, җящяди пиннан дэ манфу, гунзуǝшонди да чынгун дэ димяншонди тэпин. Ги җёйүанму панвон да жыннэ дэ го лилён, җё щүǝсынму ги дый җышыди сычиншон ба да щинҗин фишон. Йинцысы гункў мǝю вон фиди.